Home देश /विदेश नवरदेवाच्या वडिलाचे नवरीच्या आईसोबत पलायन

नवरदेवाच्या वडिलाचे नवरीच्या आईसोबत पलायन

941
0

 सुरत,प्रजामंच 22/01/2020
‘प्रेम आंधळं असतं,’ ‘प्रेमाला जात, धर्म, भाषा, प्रांत, वय अशी कुठलीही बंधनं नसतात,’ अशी अनेक वाक्ये आपण नेहमीच ऐकत असतो. या वाक्यांचा प्रत्यक्ष अनुभव देणाऱ्या घटना अधूनमधून समोर येत असतात. गुजरातमधील सुरत जिल्ह्यात एक वेगळाच प्रकार उघडकीस आला आहे. नियोजित नवरदेवाचे वडील आणि नियोजित नवरीची आई एकमेकांसोबत पळून गेल्याचा आश्चर्यकारक प्रकार घडला आहे. त्यामुळे मुला-मुलीचा हा विवाहच रद्द करण्याचा दोन्ही कुटुंबीयांनी घेतला आहे.
सूत्रांनी दिलेल्या माहितीनुसार, सुरत जिल्ह्यातील काटरग्राम येथील एका तरुणाचा विवाह नवसारी येथील तरुणीशी निश्चित झाला होता. फेब्रुवारी महिन्यात होणाऱ्या या विवाहाची तयारी दोन्ही कुटुंबीयांनी सुरू केली होती. मात्र काही दिवसांपूर्वी नियोजित वधूची आई घरातून अचानक बेपत्ता झाली. याबाबत कुटुंबीयांनी पोलिसांत तक्रार दाखल केली. याच दरम्यान नियोजित नवरदेवाचे वडीलही घरातून बेपत्ता झाले. बराच शोध घेऊनही त्यांचा ठावठिकाणा न लागल्याने त्यांच्या बेपत्ता होण्याबाबत पोलिसांत तक्रार दाखल करण्यात आली.
मुलाचे वडील आणि मुलीची आई एकाच वेळी घरातून बेपत्ता झाल्यामुळे त्यांच्या संबंधांबद्दल चर्चा सुरू झाल्या. त्यावेळी ते दोघेही तरुणपणी एकमेकांना ओळखत असल्याची बाब उघड झाली. त्यांना एकमेकांसोबत विवाह करायचा होता. मात्र, काही कारणांमुळे ते विवाहबद्ध होऊ न शकल्याची माहितीसुद्धा पुढे आली. त्यामुळे दोन्ही कुटुंबीयांनी हा विवाहच रद्द करण्याचा निर्णय घेतला. त्या दोघांना शोधून काढण्यात पोलिसांना अद्याप यश आलेले नाही. हे दोघे बेपत्ता होण्याचा एकमेकांशी संबंध नसल्याचा दावा दोन्ही कुटुंबीय करत असले तरी हे जोडपे एकत्रित असावे, अशी शंका निकटवर्तीयांना आहे.